XVIII.
Harramazka murruan goiti,
hemendik al da?
Ez dago bertze biderik.
Norena da estalki hori?
Biltzen gaituena mihisea da
zetazkoa
mihia darabilkiogu laztan
ez baita manera dotoreagorik
hitz bustiak abiatzeko
( Nirea zara, nirea zara ) dio berorrek
lehen pertsonaren indarrean
desitxuraz itsu
handinahiak mozkortua
hitzek begiak irekiko balituzte
aho bidean
gaiztuak maiztuak lodituak
Nork libratu ote ditu
baimenik gabe azalak ziztatzen?
Ai ene, euskaldun gaixoak
airezkoak, hitzaren morroi
nondik den ezin asmatu.
Baina lasai, polita,
ederrenak ere badu garai bat
bakarra
sasiak minberatu arterainokoa
Azkenerako sasiak harrapatzen baitu
eder oro, ero oro.
Zenbat eta zenbat eta zenbat azal-zauritu.
Baina, ez al da ederragoa
azala zauritua zuritua baino?
Orbainaren adio erran ezinean
zeharkatzen gaituen garratzak
badakizu,
berotik duela erotik hainbertze.
Zenbat eta zenbat eta zenbat eder
murruan goiti teilaturantz.
Murruan harriak gara,
harriak harria dakar
gogorrak gogorra
baina bihotza daramagu taupaka
denbora gorrien egarri
[ebook-a jaitsi]