III.
Kintoan pagoen hostoak
honetaz eta hartaz ari dira
baina ni nauzu, erran bezala,
beldurraz mintzo natorkizuna
Denborak ez du adinik
maitagarria denean Joana
Atea ixten dut etxean sartzean
jarraitzen didanarekiko fidagaitz
edo maite dudanari joaten ez uzteko
Baina ni naiz , bakarrik ni
atearen bi aldeetan dagoena
ez dena ez sartzen
ez ateratzen
ez duena ez sartzen
ez ateratzen uzten
Ni, eta nire beldurra
aitzinean, aldeetan, gibelean
polita deritzozu halako konpainia
halako bakardadean
daramadanak nakar noalarik
Belarra haztean
berdinetik berdinera doan berdea da.
“Berdinak, berdeak baino gehiago
horrela nahi gituzte, ezta?”
Ez ba, ez , ez eta ez!
Gaiztoa da beharra, behartsu behar gaitu
badakit
eta badakit beldurrak berak ireki dizkidalako begiak, kuraiaz begiratu ahal izan diodanean
[ebook-a jaitsi]